सेलूत दुमदुमला हरिनामाचा गजर, भजन, टाळपथकाने आली रंगत
सेलू : शिर्डीचे संत श्री साईबाबांचे सद्गुरू आणि सेलू शहराचे ग्रामदैवत श्री केशवराज बाबासाहेब महाराज (व्यंकुशाह) यांच्या २२४ व्या यात्रा महोत्सवानिमित्त गुरुवारी, ४ डिसेंबररोजी पारंपरिक पालखी मिरवणूक सोहळ्याला दुपारी चार वाजता उत्साहात सुरुवात झाली.
” गोपाळकृष्ण श्री केशवराज बाबासाहेब महाराज की जय” च्या जयघोषात; ढोल, ताशांच्या गजराने सेलूनगरी दुमदुमून गेली. अभंग, गवळणी, भारुडांचे सादरीकरण, भक्तिगीतांच्या तालासुरात महिला टाळपथकाने रंगत भरली.
श्री दत्त जयंतीला यात्रेचा मुख्य दिवस असतो. यानिमित्ताने सकाळपासूनच मंदिरात दर्शनासाठी पंचक्रोशीतील भाविकांची रीघ होती. दुपारी श्री केशवराज बाबासाहेब महाराज समाधीस्थळ आणि मंदिर प्रदक्षिणा पूर्ण करून जुन्या सेलू् शहरातील मुख्य रस्त्याने पालखी मार्गस्थ झाली. पालखीला पानफुलांची आकर्षक सजावट करण्यात आली होती. मार्गावर ठिकठिकाणी भाविकांनी पालखी पूजन तसेच फटाक्यांच्या आतषबाजीने स्वागत केले. पारंपरिक कानगी प्रसाद घेण्यासाठी गर्दी केली. महिला व पुरुष भजनी मंडळांचा उत्साहपूर्ण सहभाग दिसून आला. ठिकठिकाणी भाविकांच्या वतीने फराळ प्रसाद, पिण्याच्या पाण्याची व्यवस्था करण्यात आली होती. रात्री उशिरापर्यंत रंगलेल्या या सोहळ्यात भाविक मोठ्या संख्येने सहभागी झाले होते.
