जिल्हाधिकारी संजयसिंह चव्हाण यांचा दिव्यांगांना आत्मविश्वासाने प्रगती करण्याचा संदेश
परभणी : जागतिक दिव्यांग दिनानिमित्त परभणी शहरात काढण्यात आलेली प्रभात फेरी उत्साहात पार पडली.प्रियदर्शिनी इंदिरा गांधी जिल्हा क्रीडा संकुलात ‘सक्षम परभणी जिल्हा दिव्यांग पोर्टल’ चा उद्घाटन सोहळा जिल्हाधिकारी संजयसिंह चव्हाण यांच्या हस्ते झाला. दिव्यांगत्व हा अडथळा नसून ती शक्ती, ज्ञान आणि क्षमता आहे. दिव्यांगांनी स्वतःला कमी न समजता आपल्या क्षमता ओळखून आत्मविश्वासाने प्रगती करावी, असा संदेश दिला.
दिव्यांग कल्याणाच्या दिशेने जिल्हा प्रशासनाचा हा उपक्रम डिजिटल सुविधाकरणाचा महत्त्वपूर्ण टप्पा ठरला आहे. या पोर्टलमुळे दिव्यांगांना सर्व शासकीय योजनांची माहिती, ऑनलाइन अर्ज, अर्ज स्थिती तपासणी आणि बहुस्तरीय पडताळणी यांसारख्या सुविधा एकाच डिजिटल प्लॅटफॉर्मवर मिळणार आहेत. परिणामी, लाभार्थ्यांना वारंवार सरकारी कार्यालयात येण्याची आवश्यकता राहणार नाही. जीवनात खऱ्या अर्थाने सुलभता येईल, असे जिल्हाधिकारी म्हणाले. जिल्ह्यातील सर्व दिव्यांग व्यक्तींनी युडीआयडी कार्ड काढणे बंधनकारक असल्याचे स्पष्ट केले. तसेच, दिव्यांग व्यक्ती हक्क अधिनियम २०१६ नुसार दिव्यांगांच्या विरोधात होणाऱ्या छळ, हिंसाचार व शोषणापासून संरक्षण देण्यात आले आहे. कायद्याचा दुरुपयोग न करता दिव्यांगांच्या प्रती सौजन्याची वागणूक असावी, असे आवाहनही त्यांनी केले.
जिल्हा परिषदेच्या मुख्य कार्यकारी अधिकारी नतिशा माथूर यांनी सक्षम पोर्टलमुळे दिव्यांग सेवांमध्ये पारदर्शकता आणि गती वाढेल, असा विश्वास व्यक्त केला.
