सेलू : सेलूचे तहसीलदार डॉ. शिवाजी मगर यांची उपजिल्हाधिकारी म्हणून पदोन्नती झाल्याबद्दल साईबाबा नागरी सहकारी बँकेत त्यांचा सत्कार करून पुढील वाटचालीस शुभेच्छा देण्यात आल्या. याप्रसंगी बँकेचे संचालक तथा माजी नगराध्यक्ष पवनराजे आडळकर, नगरसेवक मिलिंद पवार, पत्रकार मोहम्मद इलियास, इंजिनिअर प्रशांत माणकेश्वर व पिंटू साडेगावकर यांची प्रमुख उपस्थिती होती.
यावेळी बोलताना पवनराजे आडळकर आणि मिलिंद पवार यांनी डॉ. मगर यांच्या कार्यशैलीचे कौतुक केले. डॉ. मगर यांनी आपल्या कार्यकाळात सर्वसामान्यांचे प्रश्न अत्यंत संवेदनशीलतेने, पारदर्शकतेने आणि तत्परतेने सोडवून प्रशासनात वेगळा आदर्श निर्माण केला. त्यांच्या या उल्लेखनीय कार्याची दखल घेऊनच त्यांना ही पदोन्नती मिळाल्याचे त्यांनी नमूद केले.
सत्काराला उत्तर देताना तहसीलदार डॉ. मगर यांनी सेलूकरांप्रती कृतज्ञता व्यक्त केली. सेलूतील नागरिक, लोकप्रतिनिधी आणि महसूल प्रशासनातील सहकाऱ्यांच्या भक्कम पाठिंब्यामुळेच लोकोपयोगी कामे यशस्वी करता आली. हे प्रेम आणि विश्वास पुढील प्रशासकीय वाटचालीत ऊर्जा देईल, अशी भावना त्यांनी व्यक्त केली. दरम्यान, पदोन्नतीबद्दल सेलू शहरात विविध क्षेत्रातील मान्यवरांनी डॉ.मगर यांचे अभिनंदन करून शुभेच्छा दिल्या आहेत.
