अभूतपूर्व उत्साहात फिरता ज्ञानेश्वरी महापारायण सोहळ्यास प्रारंभ, ग्रंथदिंडी, शोभायात्रेवर जागोजागी पुष्पवृष्टी, भक्तीमय वातावरण
सेलू (अलंकापुरीनगरी) : शिर्डीचे संत साईबाबा यांचे सद्गुरू श्री केशवराज बाबासाहेब महाराज यांच्या पावन नगरीत बुधवारी, ११ मार्चपासून सेलू येथील सातोना रोडवरील अलंकापुरीनगरीत फिरता ज्ञानेश्वरी महापारायण सांगता सोहळ्याला अभूतपूर्व उत्साहात प्रारंभ झाला. सकाळी ९ वाजता श्री केशवराज बाबासाहेब महाराज मंदिरापासून निघालेल्या भव्य ग्रंथदिंडीने आणि ‘ ज्ञानोबा-तुकाराम’ जयघोषाने अवघी सेलूनगरी दुमदुमून गेली. सारेजण भक्तीच्या रंगात न्हाऊन निघाले.
या दिंडीत रथ, तुकारामांचे अश्व आणि परभणी, जालना, बीड, वाशिम पुणे जिल्ह्यासह पंचक्रोशीतील १० हजारांहून अधिक भाविक सहभागी झाले होते. टाळ-मृदंगाच्या गजरात निघालेल्या या शोभायात्रेवर जागोजागी पुष्पवृष्टी करण्यात आली. दिंडीमध्ये सहभागी ७५० पताकाधारी वारकरी, ७५० कलशधारी, तुळशीधारी व वृक्षधारी महिला आणि विविध शाळांमधील लेझीम पथकांनी लक्ष वेधून घेतले. दिंडीत संत, महंत आणि मान्यवर सहभागी झाले होते. विशेष म्हणजे ज्ञानेश्वर आणि ज्ञानेश्वरी नाव असलेल्या व्यक्तींचा यात विशेष सहभाग होता. मार्गावर ठिकठिकाणी रांगोळ्यांची सजावट करण्यात आली होती, तर विविध गावांतील ग्रामस्थांनी वारकऱ्यांसाठी फराळ व पाण्याची सोय केली होती. या सोहळ्यात राष्ट्रसंत स्वामी गोविंददेव गिरीजी महाराज यांची श्री महाभारत संदेश कथा १२ ते १९ मार्च दरम्यान दुपारी २ ते ५ या वेळेत आयोजित करण्यात आली. याशिवाय दररोज सकाळी व रात्री नामवंत कीर्तनकारांची कीर्तने आणि विविध कार्यक्रमांची रेलचेल असणार आहे. सातोना रोडवरील २० एकर परिसरात उभारण्यात आलेल्या अलंकापुरीनगरीत या सोहळ्यासाठी भव्य मंडप उभारण्यात आला असून, संपूर्ण नियोजन प्लास्टिकमुक्त आहे. भोजनासाठी शेतकऱ्यांनी दान केलेल्या २ लाख केळीच्या पानांचा वापर केला जात आहे. शहरातील रिक्षा चालकांनीही केवळ १० रुपयांत प्रवासाची सोय देत सामाजिक बांधिलकी जपली आहे. पंडित महाराज डाके यांच्या मार्गदर्शनाखाली ज्ञानेश्वरी प्रचारक आणि विविध क्षेत्रातील भाविकांच्या पुढाकाराने सुरू असलेल्या या सोहळ्यामुळे सेलूत भक्तीमय वातावरण निर्माण झाले आहे.
