सेलूमध्ये ग्रंथदिंडी काढून उत्साहात सोहळा
सेलू : एस.बी.कुलकर्णी-कौसडीकर लिखित “बहुरंगी फुले” या कथासंग्रहाचा प्रकाशन सोहळा, १२ एप्रिल रोजी उत्साहात पार पडला. या निमित्ताने पारंपरिक पद्धतीने ग्रंथदिंडी काढून पालखीतून पुस्तकाचे प्रकाशन करण्यात आले.
कार्यक्रमाच्या सुरुवातीला वैष्णवी कुलकर्णी यांनी प्रास्ताविक केले. या कथासंग्रहात मानवी नात्यांचे पैलू, वास्तव अनुभव आणि विनोदी अशा विविध १-२ कथांचा समावेश आहे. मान्यवरांनी आपल्या भाषणात पुस्तकातील ‘माधुरी’, ‘विच्छा’ आणि ‘सोनसरी’ यांसारख्या कथांमधील जीवनमूल्यांचे कौतुक केले.अध्यक्षस्थानी डॉ. विनायकराव कोठेकर होते, तर प्रभाकर साळेगावकर यांच्या हस्ते प्रकाशन झाले. यावेळी डॉ.शरद कुलकर्णी, डॉ.आनंद देशपांडे आणि गोविंदभाऊ जोशी यांची प्रमुख उपस्थिती होती. याच कार्यक्रमात विलास कौसडीकर आणि डॉ. अमित कुलकर्णी यांचा त्यांच्या विशेष पुरस्कारांबद्दल सत्कार करण्यात आला. डॉ. जयश्री सोन्नेकर यांनी सूत्रसंचालन केले. प्रदीप कौसडीकर यांनी आभार मानले. पसायदानाने कार्यक्रमाची सांगता झाली. नागरिक आणि साहित्यप्रेमी मोठ्या संख्येने उपस्थित होते.
