प्रतिकूल परिस्थितीत विद्यार्थ्यांनी मिळवले यश
सेलू : येथील कै.सौ. राधाबाई किशनराव कान्हेकर शारदा विद्यालयाचा मार्च २०२६ मध्ये घेण्यात आलेल्या महाराष्ट्र राज्य माध्यमिक शालान्त प्रमाणपत्र परीक्षेचा निकाल ८१.८१% लागला असून निकालाची व उज्ज्वल यशाची परंपरा याही वर्षी कायम राखली आहे. या परीक्षेत कु. अनुराधा दिगांबर मिंड हिने ७८.२०% गुण मिळवून प्रथम क्रमांक पटकावला आहे. तसेच कु. साक्षी विष्णू काळे ६८% गुणांसह द्वितीय, तर चि. महादेव काशीनाथ खाकरे याने ६७.६०% गुण मिळवून तृतीय क्रमांक मिळवला आहे.
परीक्षेसाठी एकूण २२ विद्यार्थी प्रविष्ट झाले होते, त्यापैकी १८ विद्यार्थी उत्तीर्ण झाले आहेत. विशेष म्हणजे यशस्वी झालेले सर्व विद्यार्थी शेतमजूर व श्रमजीवी प्रवर्गातील असून प्रतिकूल परिस्थितीतून विद्यार्थ्यांनी मिळवलेले हे यश अत्यंत कौतुकास्पद आहे. यशस्वी विद्यार्थ्यांचे व मार्गदर्शक शिक्षकवृंदाचे संस्थेचे अध्यक्ष रामनाना पाटील, उपाध्यक्ष बल्लभजी लोया, सचिव चंद्रप्रकाश सांगतानी, सहसचिव दीपकराव खराबे, प्रशासकीय अधिकारी चंद्रशेखर नावाडे व सर्व संचालक, मुख्याध्यापक डी. डी. शिंदे, मुख्याध्यापिका उषा कामठे यांनी अभिनंदन केले आहे.
