परभणी-हिंगोली स्थानिक प्राधिकारी मतदारसंघ निवडणूक २०२६
देशनिष्ठ प्रतिनिधी, परभणी : विधान परिषदेच्या परभणी-हिंगोली स्थानिक प्राधिकारी मतदारसंघ निवडणुकीसाठी गुरुवारी, १८ जून २०२६ रोजी झालेल्या मतदानात मतदारांनी उत्स्फूर्त सहभाग नोंदवत मतदान केले. सकाळी ८ ते सायंकाळी ४ वाजेपर्यंत झालेल्या मतदानात एकूण ४६६ मतदारांपैकी ४६५ मतदारांनी मतदानाचा हक्क बजावला, त्यामुळे एकूण मतदानाची टक्केवारी ९९.७९ टक्के इतकी नोंदविण्यात आली.
निवडणुकीसाठी परभणी व हिंगोली जिल्ह्यातील सात मतदान केंद्रांवर मतदान प्रक्रिया शांततेत आणि सुरळीत पार पडली. परभणी, गंगाखेड, पाथरी, हिंगोली, कळमनुरी आणि वसमत येथील सहा केंद्रांवर १०० टक्के मतदान झाले. तर सेलू मतदान केंद्रावर ५९ पैकी ५८ मतदारांनी मतदान केल्याने तेथे ९८.३१ टक्के मतदानाची नोंद झाली.मतदानासाठी नोंद असलेल्या २१२ पुरुष आणि २५४ महिला अशा एकूण ४६६ मतदारांपैकी २११ पुरुष व सर्व २५४ महिला मतदारांनी मतदान केले. महिला मतदारांची मतदानाची टक्केवारी १०० टक्के राहिली, तर पुरुषांची मतदानाची टक्केवारी ९९.५३ टक्के नोंदविण्यात आली.जिल्हा प्रशासनाने केलेल्या प्रभावी नियोजनामुळे मतदान प्रक्रिया कोणत्याही अडचणीशिवाय पार पडली. स्थानिक स्वराज्य संस्थांच्या प्रतिनिधींनी मोठ्या उत्साहाने मतदानात सहभाग घेत लोकशाही प्रक्रियेप्रती आपली बांधिलकी पुन्हा एकदा अधोरेखित केली.
मतदान केंद्रनिहाय मतदानाची टक्केवारी : परभणी १०० टक्के, सेलू ९८.३१ टक्के, गंगाखेड १०० टक्के, पाथरी १०० टक्के, हिंगोली १०० टक्के, कळमनुरी १०० टक्के, वसमत १०० टक्के
