१४ वर्षांनंतर जेष्ठ नेते माजी आमदार रामप्रसाद बोर्डीकर यांचे परभणी जिल्हा बँकेत पुनरागमन, अध्यक्षपदाची धुरा
परभणी | प्रतिनिधी : “सगळ्याच शर्यतीत भाग घ्यायचा नसतो; काही शर्यती शांत बसून जिंकायच्या असतात!” या आशयाचे राज्यमंत्री श्रीमती मेघना साकोरे बोर्डीकर यांच्या व्हॉट्सॲप स्टेटसची आज परभणी जिल्ह्यात मोठी चर्चा रंगली. या स्टेटसनंतर काही वेळातच भारतीय जनता पक्षाचे जेष्ठ नेते माजी आमदार रामप्रसाद बोर्डीकर यांची परभणी जिल्हा मध्यवर्ती सहकारी बँकेच्या अध्यक्षपदी बिनविरोध निवड झाल्याने या संदेशाकडे राजकीय वर्तुळातून विशेष लक्ष वेधले गेले.
तब्बल १४ वर्षांनंतर रामप्रसाद बोर्डीकर यांनी जिल्हा मध्यवर्ती सहकारी बँकेच्या नेतृत्वावर पुन्हा आपले वर्चस्व प्रस्थापित केले आहे. मराठवाडा आणि महाराष्ट्राच्या राजकारणातील प्रभावी नेतृत्व म्हणून ओळख असलेल्या रामप्रसाद बोर्डीकर यांनी यापूर्वी मुंबई कृषी उत्पन्न बाजार समितीच्या सभापतीपदाची जबाबदारीही यशस्वीपणे सांभाळली आहे. त्यांच्या राजकीय कारकिर्दीत अनेक चढ-उतार आले. मध्यंतरीच्या काळात विरोधकांकडून विविध आरोप व कटकारस्थानांद्वारे त्यांची प्रतिमा मलिन करण्याचे प्रयत्न झाल्याची चर्चा राजकीय वर्तुळात होती. मात्र, त्या सर्व आव्हानांना समर्थपणे तोंड देत त्यांनी आपले राजकीय अस्तित्व कायम ठेवले आणि पुन्हा एकदा जिल्ह्याच्या राजकारणात आपले वर्चस्व सिद्ध केले.या राजकीय पुनरागमनात राज्यमंत्री श्रीमती मेघना साकोरे बोर्डीकर यांचे योगदानही महत्त्वाचे मानले जात आहे. संघटन मजबूत करणे, कार्यकर्त्यांशी सातत्याने संपर्क ठेवणे आणि जिल्ह्यातील राजकीय समीकरणे प्रभावीपणे हाताळणे यामुळे बोर्डीकर कुटुंबाचे नेतृत्व अधिक बळकट झाल्याचे समर्थकांचे मत आहे.
याच पार्श्वभूमीवर राज्यमंत्री श्रीमती मेघना साकोरे बोर्डीकर यांच्या व्हॉट्सॲप स्टेटसमधील “सगळ्याच शर्यतीत भाग घ्यायचा नसतो; काही शर्यती शांत बसून जिंकायच्या असतात!” या ओळींना विशेष महत्त्व प्राप्त झाले आहे. संयम, योग्य वेळेची प्रतीक्षा आणि निर्णायक विजयाचा संदेश देणारे हे स्टेटस आजच्या घडामोडींशी जोडले जात असून, त्याची जिल्हाभरात मोठी चर्चा सुरू आहे. रामप्रसाद बोर्डीकर यांच्या बिनविरोध निवडीमुळे परभणी जिल्ह्यातील सहकार क्षेत्रात नव्या पर्वाची सुरुवात झाल्याची भावना समर्थक व्यक्त करत आहेत.
