श्री केशवराज बाबासाहेब विद्यालयात वंचित व गरजू विद्यार्थ्यांना शैक्षणिक साहाय्य
सेलू : येथील केशवराज बाबासाहेब विद्यालयात सुवर्णकार महिला मंडळ सेलूच्या वतीने गरीब, वंचित व आर्थिक दुर्बल घटकातील २१ विद्यार्थ्यांना शालेय साहित्याचे वाटप करून एक स्तुत्य उपक्रम राबविण्यात आला.
याप्रसंगी व्यासपीठावर सुवर्णकार महिला मंडळाच्या अध्यक्षा रोहिणी राजूरकर, मंगल सराफ, मुख्याध्यापक सिद्धार्थ एडके, संजय धारासुरकर आदींसह सुवर्णकार महिला मंडळाच्या सदस्यांची प्रमुख उपस्थिती होती. सर्वप्रथम मान्यवरांच्या हस्ते सेलूचे ग्रामदैवत केशवराज बाबासाहेब महाराज यांच्या प्रतिमेचे पूजन करून कार्यक्रमाची सुरुवात करण्यात आली.
प्रास्ताविकात रोहिणी राजूरकर यांनी सांगितले की, दरवर्षी संत नरहरी महाराज यांच्या जयंतीनिमित्त वृक्षारोपण, शालेय साहित्य वाटप असे विविध समाजोपयोगी कार्यक्रम महिला मंडळाच्या वतीने राबविले जातात. यावर्षी आपल्या विद्यालयात हा उपक्रम होत असल्याचा विशेष आनंद त्यांनी व्यक्त केला. तसेच शाळेने विविध स्पर्धा परीक्षांमध्ये व १० वीच्या निकालात मिळवलेल्या उत्कृष्ट यशाबद्दल मुख्याध्यापक आणि शिक्षकांचे कौतुक केले.
याप्रसंगी संजय धारासुरकर व सिद्धार्थ एडके यांनी या स्तुत्य उपक्रमाला शुभेच्छा देऊन महिला मंडळाचे मनापासून आभार मानले. सूत्रसंचालन व आभार प्रदर्शन जयश्री सोन्नेकर यांनी केले. हा कार्यक्रम यशस्वी करण्यासाठी कृष्णा पांचाळ, सुचिता पितळे, कीर्ती कुलकर्णी, योगेश ढवारे, शुभांगी भाग्यवंत, रूपाली कुर्डे, सेवक अण्णासाहेब गायकवाड, श्यामसुंदर मुंडे, बाबासाहेब बदाले आदींनी परिश्रम घेतले.
