सेलू बाजार समिती : अकरा विरूद्ध सहा मतांनी निवड, सोमवारी पार पडली प्रक्रिया, जल्लोषात मिरवणूक
सेलू जि.परभणी : स्वातंत्र्यपूर्व काळात १९३१ मध्ये अस्तित्वात आलेल्या सेलू कृषी उत्पन्न बाजार समितीच्या १४ व्या सभापतीपदी भारतीय जनता पक्षाचे डॉ.संजय रामराव रोडगे यांची ११ विरुद्ध ६ मतांनी निवड झाली आहे. निवडीनंतर बाजार समितीपासून डॉ.रोडगे यांची जल्लोषात विजयी मिरवणूक काढण्यात आली. पालकमंत्री मेघना साकोरे-बोर्डीकर यांनी नवनिर्वाचित सभापती डॉ.रोडगे यांचा सत्कार करून शुभेच्छा दिल्या.
बाजार समितीचे तत्कालीन सभापती चक्रधर पौळ यांनी प्रकृती ठीक नसल्याचे कारण देत राजीनामा दिला होता. त्यामुळे सोमवारी, २२ सप्टेंबर रोजी बाजार समितीच्या सभागृहात निवडणूक निर्णय अधिकारी संदीप तायडे यांच्या अध्यक्षतेखाली संचालक मंडळाच्या विशेष बैठकीचे आयोजन करण्यात आले होते. सकाळी ११ वाजता उमेदवारी अर्ज भरण्यास सुरुवात झाली, ११.१५ वाजता अर्जांची छाननी झाली आणि १२ वाजता प्रत्यक्ष निवड प्रक्रियेला सुरुवात झाली. डॉ.रोडगे आणि नामदेव डख हे दोन उमेदवार रिंगणात होते. एकूण १८ पैकी १७ संचालक मतदानासाठी उपस्थित होते, तर चक्रधर पौळ गैरहजर राहिले. नवीन सभापती डॉ.रोडगे यांच्या निवडीसाठी ११ संचालकांनी मतदान केले. यामध्ये अनिल पवार, प्रसाद डासाळकर, अनिता ताठे, वर्षा सोळंके, शैलेश तोष्णीवाल, अनिल बरडे, रामेश्वर राठी, ॲड. दत्ता कदम, गोकर्णा पडघन, आणि डॉ. संजय रोडगे यांचा समावेश होता. तर प्रतिस्पर्धी उमेदवार नामदेव डख यांना ६ मते मिळाली. त्यांना गोरख भालेराव, राजेंद्र लहाने, पुरुषोत्तम पावडे, प्रकाश मुळे, गणेश आकात, आणि नामदेव डख यांनी मतदान केले. प्रशासकीय अधिकारी संदीप तायडे यांनी निवडणूक प्रक्रियेचे काम पाहिले. या निवडीबद्दल विविध स्तरांतून डॉ.रोडगे यांचे अभिनंदन होत आहे.
बाजार समितीला लाभले उच्चविद्याविभूषित सभापती
स्वातंत्र्यपूर्व काळात १९३१ मध्ये अस्तित्वात आलेल्या सेलू कृषी उत्पन्न बाजार समितीला डॉ. संजय रोडगे यांच्या रूपात १४ वे सभापती मिळाले आहेत. डॉ,रोडगे हे उच्चविद्याविभूषित असून सामाजिक, शैक्षणिक क्षेत्रात त्यांचे मोठे योगदान आहे. श्रीराम प्रतिष्ठानच्या माध्यमातून नवनवीन शैक्षणिक प्रयोग, प्रकल्प, उपक्रमाव्दारे सेलू आणि परिसराला शैक्षणिक हब म्हणून विकसित करण्यासाठी त्यांची सतत धडपड सुरूच असते. त्यांच्या आधी १३ सभापतींनी बाजार समितीचा कारभार पाहिला आहे. यामध्ये रंगनाथ पाटील, आबा झोडगावकर, रावसाहेब वाघ, विठ्ठलराव वाघ, दत्तराव मोगल, रविंद्र डासाळकर, दिनकर वाघ, मुख्य प्रशासक मंगेश सुरवसे, माधव यादव, विनायक पावडे, रणजीत गजमल, संजय अब्दागीरे, संतोष काळे आणि चक्रधर पौळ यांचा समावेश आहे.
