पालम बाजार समिती : आमदार रत्नाकर गुट्टे यांच्याहस्ते सत्कार; शहरातून ढोल-ताशांच्या गजरात मिरवणूक
पालम (शिवाजी शिंदे) : पालम कृषी उत्पन्न बाजार समितीच्या सभापतीपदी तुषार गोळेगावकर यांची बिनविरोध निवड करण्यात आली आहे. निवडणूक अधिकारी अनिल नादरे यांच्या अध्यक्षतेखाली गुरुवारी, १६ ऑक्टोबर २०२५ रोजी सकाळी साडे अकरा वाजता बाजार समितीच्या सभागृहात सभेचे आयोजन करण्यात आले होते.
या सभेसाठी एकूण अठरा सदस्यांपैकी पंधरा सदस्य उपस्थित होते, तर तीन सदस्य गैरहजर होते. सभापती पदासाठी तुषार गोळेगावकर यांचा एकमेव अर्ज आल्यामुळे त्यांची बिनविरोध निवड झाल्याचे जाहीर करण्यात आले. यावेळी सहाय्यक निबंधक कार्यालयाचे भायकर, देवकर, सचिव प्रशांत जाधव, संजय गुंडाळे, कल्याण हनवते, सिताराम शिंदे, अंगद शिरसकर आदी कर्मचारी उपस्थित होते.
नवनिर्वाचित सभापती तुषार गोळेगावकर यांचा शाल, श्रीफळ व पुष्पगुच्छ देऊन आमदार रत्नाकर गुट्टे यांच्याहस्ते सन्मान करण्यात आला. त्यानंतर शहरातून ढोल-ताशांच्या गजरात त्यांची मिरवणूक काढण्यात आली. मिरवणुकीत आमदार रत्नाकर गुट्टे, वसंतराव शिरसकर, जिया पठाण, माधव गायकवाड, भास्करराव शिरस्कर, गिरीश सोळंके आदी लोकप्रतिनिधी आणि कार्यकर्ते मोठ्या संख्येने उपस्थित होते. निवडीदरम्यान पालम पोलिसांनी कोणताही अनुचित प्रकार घडू नये यासाठी मोठा पोलीस बंदोबस्त ठेवला होता.
