माजी मुख्यमंत्री अशोक चव्हाण यांच्या उपस्थितीत समर्थकांसह पक्षप्रवेश
परभणी : आगामी नगरपालिका निवडणुकीच्या पार्श्वभूमीवर सेलूचे माजी नगराध्यक्ष विनोद बोराडे यांनी त्यांच्या समर्थकांसह माजी मुख्यमंत्री अशोक चव्हाण आणि जिल्ह्याच्या पालकमंत्री मेघना साकोरे-बोर्डीकर यांच्या प्रमुख उपस्थितीत शनिवारी, २५ ऑक्टोबर रोजी भारतीय जनता पार्टीत प्रवेश केला.
भाजपचे ज्येष्ठ नेते माजी आमदार रामप्रसाद बोर्डीकर, माजी आमदार सुरेश वरपुडकर, जिल्हाध्यक्ष भुमरे, संतोष मुरकुटे, आणि प्रभाकर वाघीकर आदींसह पदाधिकारी उपस्थित होते. बोराडे यांचे मोठे बंधू आणि खरेदी विक्री संघाचे अध्यक्ष मुकेश बोराडे, साईराज बोराडे यांच्यासह काँग्रेसचे माजी नगरसेवक मिलिंद सावंत, मारोती चव्हाण, प्रभाकर सुरवसे, बालाजी झमकडे, राजेंद्र पवार, वहिद अन्सारी, विठ्ठल काळबांडे, मनीष कदम, बबन गायकवाड, गौतम धापसे, शेख कासिम यांच्यासह मित्र मंडळाचे कार्यकर्ते आणि इतर माजी सदस्यांनीही भारतीय जनता पार्टीत प्रवेश केला. उपस्थित मान्यवरांनी नवनियुक्त सदस्यांचे जोरदार स्वागत केले. मागील ३० वर्षांपासून नगरपालिका राजकारणात सक्रिय असलेले विनोद बोराडे यांच्यासारखे सेलू शहरातील महत्त्वाचे राजकीय नेतृत्व भाजपत दाखल झाल्याने निवडणुकीच्या तोंडावर सेलूतील स्थानिक पातळीवरील राजकीय समीकरणे मोठ्या प्रमाणावर बदलणार आहेत.
