परभणी : परभणी जिल्ह्यातील गुरुवारी, २८ ऑगस्टरोजी सरासरी २५.७ मिलीमिटर पाऊस झाला. गंगाखेड, पालम, पूर्णा, सेलू तालुक्यात जोरदार पाऊस झाला, बुधवारी रात्री बहुतांशी भागात हलका ते मध्यम स्वरूपाचा पाऊस झाला. गुरुवारी सकाळपासूनच ढगाळ वातावरण होते. दुपारपर्यंत मध्यम स्वरूपाचा पाऊस झाला. सायंकाळीही रिमझिम सुरू होती.
दरम्यान, गंगाखेड तालुक्यातील धारखेड, मुळी, सायला, सुनेगाव खळी गावाच्या हद्दीतील शेतांना नैसर्गिक आपत्तीच्या अनुषंगाने गुरुवारी भेट देऊन पाहणी करण्यात आली. या वेळी आमदार रत्नाकर गुट्टे, उपविभागीय अधिकारी जीवराज डापकर आदी उपस्थित होते. गुरुवारी सकाळपर्यंत तालुकानिहाय झालेला सरासरी पाऊस मिलिमीटरमध्ये : परभणी १२.५, गंगाखेड ४१.४ पाथरी १८.७ जिंतूर २३.५ पूर्णा ३०.९, पालम ४१.१, सेलू ३३, सोनपेठ १३.४ मानवत २२.२
मासोळी प्रकल्प ७१ टक्के भरला
परभणी जिल्ह्यातील मासोळी (ता . गंगाखेड) मध्यम प्रकल्पात ७१% पेक्षा जास्त पाणीसाठा जमा झाल्यामुळे कोणत्याही क्षणी विसर्ग होण्याची शक्यता असल्यामुळे नदीकाठच्या गावांना सतर्कतेचा इशारा देण्यात आला आहे. २८ ऑगस्ट रोजी सायंकाळी ४.३० वाजता मासोळी प्रकल्पाची पाणीपातळी ४१४.८० मीटर एवढी झाली आहे. पाणलोट क्षेत्रात होत असलेल्या पावसामुळे प्रकल्पात पाण्याची आवक सतत वाढू लागली आहे. कोणत्याही क्षणी प्रकल्पाच्या सांडव्याद्वारे नदीपात्रात पाणी सोडले जाण्याची शक्यता आहे. प्रकल्पाच्या सिंचन विभागाचे शाखाधिकारी यांनी ही माहिती दिली आहे.
