सेलूत आज शोभायात्रा, ग्रंथदिंडी, हेलिकॉप्टरद्वारे होणार पुष्पवृष्टी
सेलू जि.परभणी : सेलू जि.परभणी येथील सातोना रोडवरील मयुरी पार्कच्या २० एकर परिसरात ११ मार्चपासून फिरता ज्ञानेश्वरी पारायण सांगता सोहळ्याचे आयोजन करण्यात आले आहे. या सोहळ्यासाठी भव्य अलंकापुरीनगरी उभारण्यात आली असून मंगळवारी, १० मार्च रोजी माजी आमदार रामप्रसाद बोर्डीकर यांच्या हस्ते धर्मध्वजारोहण पार पडले.
यावेळी प्राचार्य डॉ. विनायकराव कोठेकर, कृष्णा महाराज रासवे, नगराध्यक्ष मिलिंद सावंत, माजी नगराध्यक्ष विनोद बोराडे, जयप्रकाश बिहाणी, पंडित महाराज डाके आदींसह मान्यवरांची उपस्थिती होती. बुधवार, ११ मार्च रोजी सकाळी ९ वाजता श्री केशवराज बाबासाहेब महाराज मंदिरापासून ग्रंथदिंडी व शोभायात्रेने सुरुवात होईल. या शोभायात्रेवर हेलिकॉप्टरद्वारे पुष्पवृष्टी केली जाणार असून यामध्ये लेझीम पथक, ७५० पताकाधारी वारकरी, कलशधारी महिला आणि वृक्षधारी महिलांचा सहभाग असेल.या नऊ दिवसांच्या सोहळ्यात अयोध्या येथील राष्ट्रसंत स्वामी गोविंददेव गिरीजी महाराज यांच्या ‘श्री महाभारत संदेश’ कथेचे आयोजन १२ मार्चपासून दुपारी २ ते ५ या वेळेत करण्यात आले आहे. तसेच राज्यातील नामवंत कीर्तनकारांची सेवा भाविकांना लाभणार आहे. सेलू, जिंतूर, मानवत आणि परभणी जिल्ह्यातील सुमारे २०० गावांतील नागरिक यामध्ये सहभागी होणार आहेत.
