मानोरा पोलिसांची धडक कारवाई; मुद्देमालासह आरोपी गजाआड
वाशिम : पो.स्टे. मानोरा हद्दीतील पारवा व देऊरवाडी येथील बकरी चोरीप्रकरणी पोलिसांनी चार जणांच्या टोळीचा पर्दाफाश केला आहे. पारवा येथील सीसीटीव्ही फुटेजवरून संशयित अर्टिका गाडीचा शोध घेत पोलिसांनी यवतमाळ जिल्ह्यातील ब्राम्हणगाव येथून सतिष भारत श्रृंगारे (वय २९) याला ताब्यात घेतले.
त्याची विचारपूस केली असता त्याने साथीदार करण विनोद राठोड (वय २३), प्रथमेश दिलीप पवार (वय २२) आणि तुषार किशोर जाधव (वय १९) यांच्यासह गुन्ह्याची कबुली दिली. आरोपी प्रथमेश पवार याच्या घराच्या झडतीत चोरीच्या ५ बकऱ्या आढळल्या. यातील ३ बकऱ्या देउरवाडी येथील महादेव श्रावण शिंदे यांच्या तर २ बकऱ्या पारवा येथील ज्ञानेश्वर सुखदेव राठोड यांच्या असल्याचे निष्पन्न झाले.
पोलिसांनी ४९,००० रुपये किमतीच्या ५ बकऱ्या आणि ७,००,००० रुपयांची अर्टिका गाडी (एम एच २९ सीजे ०९३८) असा एकूण ७,४९,००० रुपयांचा मुद्देमाल जप्त केला आहे.
ही कामगिरी पोलीस अधीक्षक निकेश खाटमोडे (पाटील), अपर पोलीस अधीक्षक श्रीमती लता फड, उपविभागीय पोलीस अधिकारी मनिष ठाकरे यांच्या मार्गदर्शनात पोलीस निरीक्षक श्रीमती नैना पोहेकर, पोउपनी दिनकर राठोड, पोउपनी रमेश पवार, पोहवा राधेश्याम महल्ले, शेषराव राठोड, पोकॉ रोहन तायडे, फिरोज शेख, अनिल दहातोंडे, पंकज खाडे आणि राम राठोड यांनी केली. गुन्ह्याचा पुढील तपास पोउपनी दिनकर राठोड करत आहेत.
