मंगरुळपीर शहरात रस्त्यांवर भीतीचे वातावरण व अपघाताचा धोका; नगरपालिकेकडे तातडीने बंदोबस्त करण्याची निवेदनाद्वारे मागणी
मंगरुळपीर (फुलचंद भगत) : शहरातील विविध प्रमुख रस्त्यांवर मोठ्या प्रमाणात मोकाट कुत्रे तसेच जनावरे फिरत असल्याने नागरिकांच्या सुरक्षिततेचा आणि जीविताचा प्रश्न ऐरणीवर आला आहे. या गंभीर समस्येची दखल घेऊन मोकाट कुत्रे व जनावरांचा कायमस्वरूपी बंदोबस्त करावा, अशी मागणी सामाजिक कार्यकर्ते किशोर गावंडे यांनी मंगरुळपीर नगर परिषदेच्या मुख्याधिकाऱ्यांकडे निवेदनाद्वारे केली आहे.
शहरातील मुख्य रस्त्यांवर कुत्र्यांच्या टोळ्या आणि जनावरांचा वावर वाढला आहे. रात्रीच्या वेळी कुत्रे नागरिकांच्या अंगावर धावून जाण्याचे प्रकार घडत असून लहान मुले, महिला व ज्येष्ठ नागरिकांमध्ये भीतीचे वातावरण आहे. तसेच रस्त्याच्या मधोमध ठाण मांडून बसणाऱ्या आणि अचानक वाहनांसमोर येणाऱ्या जनावरांमुळे दुचाकी व चारचाकी वाहनधारकांची मोठी तारांबळ उडत असून अपघाताची शक्यता वाढली आहे.या निवेदनासोबत पुरावा म्हणून संबंधित ठिकाणची छायाचित्रे व व्हिडिओ प्रशासनाला सादर करण्यात आले आहेत. निवेदनाद्वारे मोकाट कुत्र्यांना पकडून सुरक्षित ठिकाणी हलवणे, मोकाट जनावरांचा बंदोबस्त करणे, अपघातप्रवण क्षेत्रांची पाहणी करणे, नागरिकांसाठी विशेष हेल्पलाइन सुरू करणे आणि नियमित मोहीम राबवणे अशा विविध मागण्या करण्यात आल्या आहेत. एखादी गंभीर दुर्घटना घडण्यापूर्वी नगर परिषद प्रशासनाने तातडीने ठोस कारवाई करावी, अशी अपेक्षा शहरवासीयांकडून व्यक्त केली जात आहे.
