शैक्षणिक, सामाजिक आणि आर्थिक प्रगतीसाठी विविध मागण्यांचे निवेदन
सेलू : मुस्लिम समाजाच्या सर्वांगीण विकासासाठी आणि त्यांच्या शैक्षणिक, आर्थिक, सामाजिक, सांस्कृतिक व राजकीय मागासलेपण दूर करण्याकरिता सामाजिक कार्यकर्ते शेख महेमुद अमिनोद्दीन यांनी अल्पसंख्याक आयुक्त श्रीमती प्रतिभा इंगळे यांच्याकडे निवेदन सादर केले आहे. निवेदनात, भारत सरकार आणि महाराष्ट्र सरकारद्वारे नेमलेल्या रंगनाथ मिश्रा आयोग, सच्चर समिती आणि महेमुद-ऊर्र-रहेमान समितीच्या अहवालांनुसार मुस्लिम समाजाचे मागासलेपण सिद्ध झाले असल्याचे नमूद करण्यात आले आहे.
प्रमुख मागण्या :
- आरक्षण: मुस्लिम समाजाला विशेष मागासवर्ग (SBC) घोषित करून सर्व क्षेत्रांत १०% आरक्षण देण्यात यावे. तसेच, २०१४ साली तत्कालीन सरकारने घोषित केलेले आणि उच्च न्यायालयाने शैक्षणिक क्षेत्रात मान्य केलेले ५% आरक्षण तात्काळ लागू करावे.
- संशोधन व प्रशिक्षण संस्था: ‘सारथी’, ‘आर्टी’, आणि ‘बार्टी’ यांच्या धर्तीवर अल्पसंख्याक संशोधन व प्रशिक्षण संस्था मोठ्या निधीसह पूर्ण क्षमतेने कार्यान्वित करावी.
- शैक्षणिक फी सवलत: वैद्यकीय, अभियांत्रिकी आणि इतर व्यावसायिक शिक्षण घेणाऱ्या मुस्लिम विद्यार्थ्यांना शिष्यवृत्ती योजनेमार्फत ५०% फी सवलत देण्यात यावी.
- सहकारी संस्था: मागासवर्गीय सहकारी संस्थांप्रमाणेच अल्पसंख्याक सहकारी संस्था स्थापन करण्यासाठी कायदा करावा.
- इतर मागण्या: प्रत्येक तालुक्यात उर्दू घर आणि सांस्कृतिक सभागृह उभारण्यात यावे. रंगनाथ मिश्रा आयोग, सच्चर समिती आणि महेमुद-ऊर्-रहेमान समितीच्या शिफारशींची अंमलबजावणी करावी. तसेच, तत्कालीन पंतप्रधान मनमोहनसिंग यांनी सुरू केलेल्या १५ कलमी योजनेची पूर्ण क्षमतेने अंमलबजावणी करावी.
