२.२५ कोटींचा निव्वळ नफा; सभासदांच्या विश्वासाला यशाची जोड
सेलू : परभणी जिल्ह्यातील अग्रगण्य सहकारी संस्थांपैकी एक असलेल्या साईबाबा नागरी सहकारी बँक मर्यादित, सेलू यांनी आर्थिक वर्ष २०२५-२६ मध्ये उत्कृष्ट कामगिरीची नोंद केली आहे. बँकेने ३० वर्षांचा यशस्वी प्रवास पूर्ण केला असून, सरत्या आर्थिक वर्षात बँकेचा एकूण व्यवसाय ४२१.२२ कोटी रुपयांवर पोहोचला आहे. संस्थापक अध्यक्ष हेमंतराव आडळकर यांनी ही माहिती दिली.
बँकेने प्रसिद्ध केलेल्या आकडेवारीनुसार, ३१ मार्च २०२६ अखेर विविध वित्तीय निकषांवर बँकेने समाधानकारक वाढ दर्शवली आहे. बँकेच्या ठेवींमध्ये मोठी वाढ झाली असून त्या २६७.२२ कोटी रुपयांवर पोहोचल्या आहेत, तर मागील वर्षी हा आकडा २३६.५२ कोटी इतका होता. तसेच, कर्ज व अग्रिम रकमा १५४ कोटी रुपयांपर्यंत विस्तारल्या आहेत.बँकेने यावर्षी ३.९३ कोटी रुपयांचा ढोबळ नफा कमावला असून, सर्व आवश्यक तरतुदींनंतर बँकेचा निव्वळ नफा २.२५ कोटी रुपयांवर पोहोचला आहे. बँकेचे भागभांडवल ७.२२ कोटी रुपये असून राखीव व इतर निधी १८.४८ कोटी रुपये इतका आहे. विशेष म्हणजे, आपल्या सभासदांना दरवर्षी १०% लाभांश वाटप करणारी ही एकमेव बँक ठरली आहे.बँकेच्या दृष्टीने सर्वात महत्त्वाची बाब म्हणजे थकीत कर्जाचे प्रमाण कमी करण्यात आलेले यश होय. बँकेचा निव्वळ एनपीए आता केवळ १.००% इतकाच राहिला असून, हे बँकेच्या भक्कम आर्थिक स्थितीचे निदर्शक आहे. संस्थापक अध्यक्ष हेमंतराव मुरलीधरराव आडळकर यांच्या मार्गदर्शनाखाली बँक सध्या परभणीसह जालना, हिंगोली, नांदेड आणि बीड या ५ जिल्ह्यांमध्ये कार्यरत आहे. बँकेच्या सध्या ७ शाखा आणि ४ एटीएम केंद्रांद्वारे ग्राहकांना आधुनिक सेवा पुरवली जात आहे. बँकेच्या या यशाबद्दल संचालक मंडळ आणि कर्मचारी वृंदाने सर्व सभासद, ठेवीदार आणि कर्जदारांचे आभार मानले आहेत.
