अहमदाबाद येथील शानदार सोहळ्यात वितरण
जिंतूर : जिंतूर तालुक्यातील पुंगळा येथील सुपुत्र, कवी व पर्यावरणप्रेमी अण्णासाहेब संजाबराव जगताप यांना गुजरात राज्यातील अहमदाबाद येथे प्रतिष्ठेचा “सरदार वल्लभभाई पटेल मेमोरियल अवॉर्ड – २०२६” प्रदान करून सन्मानित करण्यात आले. शनिवार, २३ मे रोजी झालेल्या भव्य पुरस्कार सोहळ्यात त्यांना हा मानाचा पुरस्कार देण्यात आला.
पीपल मॅन फाउंडेशन, दिल्ली व ओम फिल्म सिटी, अहमदाबाद यांच्या संयुक्त विद्यमाने विविध क्षेत्रात उल्लेखनीय कार्य करणाऱ्या भारतातील तसेच विदेशातील पर्यावरणप्रेमी व समाजसेवकांना हा पुरस्कार प्रदान करण्यात आला. महाराष्ट्रातून या पुरस्कारासाठी अण्णासाहेब जगताप यांची निवड पर्यावरण क्षेत्रातील त्यांच्या उल्लेखनीय कार्याची दखल घेऊन करण्यात आली होती. भारतातील तब्बल २८ राज्यांतील पर्यावरणप्रेमी व समाजसेवकांना यावेळी सन्मानित करण्यात आले.अहमदाबाद येथील ओम फिल्म सिटीमध्ये आयोजित करण्यात आलेल्या या पुरस्कार सोहळ्यास विविध क्षेत्रातील मान्यवर उपस्थित होते. यामध्ये आचार्य डॉ. लोकेश मुनिजी (जैन भिक्षु, लेखक व वक्ते – राजस्थान), प्रो. डॉ. पी. के. राजपूत (भारतीय औषध निर्माण शिक्षणतज्ञ – गुजरात), प्रो. डॉ. समीर सुत (राष्ट्रीय फॅशन तंत्रज्ञान संस्था – NIFT, दिल्ली), फैज खान (रिपोर्टर – दिल्ली), डॉ. संजीव कुमार (शिक्षणतज्ञ – उत्तराखंड) तसेच डॉ. रघुराज सिंग (दिल्ली) यांचा समावेश होता.
अण्णासाहेब जगताप हे “निसर्गशाळा” या उपक्रमाच्या माध्यमातून महाराष्ट्रभरातील शालेय विद्यार्थ्यांमध्ये पर्यावरण संवर्धनाची जाणीव निर्माण करण्याचे कार्य करत आहेत. विद्यार्थ्यांना रोपवाटिका विकसित करण्यासाठी प्रोत्साहन देणे, झाडांवर आधारित कथा-कवितांचे संकलन करणे, “एक मूल – तीस झाडे” हे अभियान राबविणे, तसेच शेतकऱ्यांच्या मालाला योग्य हमीभाव मिळवून देण्यासाठी “झेंडूची फुले अभियान” अशा विविध उपक्रमांतून त्यांनी समाजात वेगळी ओळख निर्माण केली आहे.ग्रामीण भागात पर्यावरण जागृतीसाठी सातत्याने केलेले कार्य, विद्यार्थ्यांमध्ये निसर्गप्रेम निर्माण करण्यासाठी घेतलेले प्रयत्न आणि सामाजिक बांधिलकी जपत राबविलेल्या विविध उपक्रमांची दखल घेऊन त्यांना हा प्रतिष्ठेचा पुरस्कार प्रदान करण्यात आला.
त्यांच्या या यशाबद्दल शब्दसह्याद्री प्रतिष्ठान, जिंतूर , चतुरंग प्रतिष्ठान परभणी, परभणी ऍस्ट्रॉनॉमिकल सोसायटीसह संपूर्ण परभणी जिल्ह्यातून त्यांच्यावर अभिनंदनाचा वर्षाव होत आहे.
