तुझी सेवा करीन मनोभावे : सेलूतील श्रुती संगीत विद्यालय आणि विनोद बोराडे मित्र मंडळाचा सांस्कृतिक उपक्रम
सेलू : येथील श्री केशवराज बाबासाहेब मंदिरात सोमवार, २० ऑक्टोबर २०२५ रोजी सकाळी सात वाजता ‘दिवाळी पहाट’ या विशेष सांस्कृतिक कार्यक्रमाचे आयोजन करण्यात आले होते. श्रुती संगीत विद्यालय प्रस्तुत आणि विनोद बोराडे मित्र मंडळाच्या वतीने आयोजित या कार्यक्रमात सूरांच्या दीपांनी आणि भावनांच्या सुरावटीने दिवाळीचा आनंद द्विगुणित करण्यात आला.
आयोजक रवी कुलकर्णी, रवी मुळावेकर व गंगाधर कान्हेकर यांच्या मार्गदर्शनाखाली झालेल्या या सुरेल सोहळ्याला विविध क्षेत्रातील मान्यवर अधिकारी आणि नागरिक मोठ्या संख्येने उपस्थित होते. मान्यवरांच्या हस्ते सरस्वती मातेच्या प्रतिमेचे पूजन करून कार्यक्रमाची मंगलमय सुरुवात झाली. कार्यक्रमाचे ओघवत्या शैलीतील निवेदन प्राध्यापक संजय पिंपळगावकर यांनी केले.
मुख्य गायक अमोल मोरे यांनी ‘राग मियां की तोडी’ मध्ये झपताल व तीनताल मधील बंदिश, पहाडी रागामध्ये ‘सैयां बिना घर सूना’ ही ठुमरी, ‘शब्दावाचून कळले सारे’ हे भावगीत आणि ‘घेई छंद मकरंद’ हे नाट्यगीत सादर केले. याशिवाय, त्यांनी राग मिश्र जोगवर आधारित ‘तुझी सेवा करीन मनोभावे’ हा अभंग आणि भैरवीमध्ये ‘हेची दान देगा देवा’ या अभंगाचे अप्रतिम सादरीकरण करून सेलूतील संगीत रसिकांना मंत्रमुग्ध केले. या सादरीकरणाला अशोक मोरे आणि ॲड. विशाल मोरे यांनी तबला साथ दिली, तर पूजा तोडकर यांनी हार्मोनियम साथ दिली. सहगायक म्हणून सतीश राठोड व विलास शेरे यांनी साथ दिली.कार्यक्रमाच्या मध्यावर अशोक मोरे आणि ॲड. विशाल मोरे यांनी तीन ताल मधील ‘तबला जुगलबंदी’ सादर करून रसिकांना सुरांच्या अद्भुत अनुभूतीत गुंतवले. यात पारंपरिक बंदिशी, लयकारी आणि तालांच्या विविध प्रयोगांचा समावेश होता. या जुगलबंदीला अमोल मोरे यांनी हार्मोनियम साथ दिली.
यावेळी माजी नगराध्यक्ष विनोद बोराडे, माजी सभापती अशोक काकडे, गोविंद जोशी, प्राचार्य विनायक कोठेकर, जयप्रकाश बिहानी, नंदकिशोर बाहेती, किशोर जोशी, शिवाजी महाराज खवणे आदी मान्यवर उपस्थित होते. संगीत, संस्कृती आणि स्नेहाचा संगम असलेल्या या ‘दिवाळी पहाट’ कार्यक्रमाने रसिकांच्या मनात दीपावलीचे आनंददायी पर्व उजळून टाकले आणि सेलूच्या सांस्कृतिक वातावरणात एक सुरेल भर पडली.
