प्राची शिंदे ९७.२० गुण मिळवून सर्वप्रथम; तर १९ विद्यार्थी ९० टक्क्यांपेक्षा जास्त गुणांसह उत्तीर्ण
सेलू : येथील नूतन विद्यालयाने इयत्ता दहावी परीक्षेच्या निकालात आपली यशस्वी परंपरा कायम राखत ८७.५७ टक्के निकालासह उल्लेखनीय यश संपादन केले आहे. महाराष्ट्र राज्य माध्यमिक शिक्षण मंडळाच्या वतीने घेण्यात आलेल्या या परीक्षेचा निकाल शुक्रवारी ८ मे २०२६ रोजी जाहीर झाला. नूतन विद्यालय शिक्षण संस्था संचालित या विद्यालयातील एकूण ५१५ विद्यार्थ्यांपैकी ४५१ विद्यार्थी उत्तीर्ण झाले आहेत.
प्रशालेतील गुणवंत विद्यार्थ्यांमध्ये प्राची बाळासाहेब शिंदे हिने ९७.२० टक्के गुण मिळवून प्रथम क्रमांक पटकावला आहे. महेश राजेभाऊ गिराम, मधुश्री धनंजय आष्टीकर आणि दर्शना रेणुकादास जोशी या तिघांनीही समान ९६.६० टक्के गुण प्राप्त करून द्वितीय क्रमांक मिळवला. तसेच आर्या भाऊराव घांडगे हिने ९६ टक्के गुणांसह तृतीय क्रमांक पटकावला आहे. प्रशालेतील एकूण १९ विद्यार्थ्यांनी ९० टक्क्यांहून अधिक गुण मिळवून घवघवीत यश संपादन केले.या यशाबद्दल नूतन विद्यालय शिक्षण संस्थेचे अध्यक्ष डॉ. एस. एम. लोया, उपाध्यक्ष डी. के. देशपांडे, सचिव प्राचार्य डॉ. विनायकराव कोठेकर, सहसचिव जयप्रकाश बिहाणी, कार्यकारिणी सदस्य नंदकिशोर बाहेती, प्रशासकीय अधिकारी प्राचार्य डॉ. शरद कुलकर्णी, शालेय समितीचे अध्यक्ष सिताराम मंत्री, मुख्याध्यापक संतोष पाटील, उपमुख्याध्यापक किरण देशपांडे, पर्यवेक्षक शंकर बोधनापोड, गणेश माळवे आणि सर्व शिक्षक व शिक्षकेतर कर्मचाऱ्यांनी विद्यार्थ्यांचे अभिनंदन केले आहे.
