आषाढी एकादशीनिमित्त बाल वारकऱ्यांची दिंडी उत्साहात
सेलू : आषाढी एकादशीनिमित्त २५ जुलै रोजी विवेकानंद विद्यालय, सेलू येथे वारकरी दिंडी सोहळ्याचे आयोजन करण्यात आले होते. यात विद्यार्थ्यांनी उत्स्फूर्त सहभाग नोंदवला.
वारकरी वेशभूषेत सजलेल्या चिमुकल्या बाल वारकऱ्यांनी उपस्थितांचे लक्ष वेधून घेतले.विद्यार्थ्यांनी डोक्यावर तुळशी वृंदावन, हातात भगवी पताका व टाळ-चिपळ्या घेऊन “ज्ञानोबा-तुकाराम” आणि “पुंडलिक वरदा हरी विठ्ठल” च्या गजरात दिंडी काढली. विठ्ठल-रुक्मिणी, संत ज्ञानेश्वर व संत तुकाराम यांच्या वेशभूषेतील विद्यार्थ्यांनी वारकरी परंपरेचे दर्शन घडवले. याप्रसंगी अभंग व विठ्ठलभक्ती गीतांचे गायन झाले.म्हाडा कॉलनीतील नागरिकांनी विद्यार्थ्यांना खाऊ वाटप केले. लोकमंगल नगर येथील विठ्ठल मंदिरात आरतीने दिंडीचा समारोप झाला व तेथील नागरिकांकडून प्रसादाचे वाटप करण्यात आले.कार्यक्रमाच्या यशस्वीतेसाठी मुख्याध्यापक, सर्व शिक्षक व शिक्षकेतर कर्मचाऱ्यांनी विशेष परिश्रम घेतले.
