सेलू पोलिसांत पतीची तक्रार; गुगळी धामणगाव येथील घटना;
सेलू | प्रतिनिधी : तालुक्यातील गुगळी धामनगाव येथून २१ वर्षीय महिला आपल्या ११ महिन्यांच्या मुलीसह बेपत्ता झाल्याची घटना १२ ऑगस्ट रोजी घडली. याप्रकरणी महिलेचे पती विठ्ठल काळे यांनी सेलू पोलीस ठाण्यात खबर दिली आहे.
पोलिसांनी दिलेल्या माहितीनुसार, आरती विठ्ठल काळे (वय २१, व्यवसाय घरकाम, रा. गुगळी धामणगाव) ही महिला १२ ऑगस्ट रोजी दुपारी सुमारे ४ वाजण्याच्या सुमारास आपल्या ११ महिन्यांच्या मुलगी नंदिनी हिला सोबत घेऊन घरातून कोणासही काही न सांगता निघून गेली. त्यावेळी तिचे पती व सासू शेतातील कामासाठी बाहेर गेले होते.सायंकाळी पती घरी परतल्यानंतर घराला कडी लावलेली आढळून आली. त्यांनी शेजारी तसेच नातेवाईकांकडे चौकशी केली; मात्र आरती व मुलगी नंदिनी यांच्याबाबत कोणतीही माहिती मिळाली नाही. त्यानंतर महिलेच्या माहेरच्या नातेवाईकांना माहिती देण्यात आली. सर्वांनी शोध घेतल्यानंतरही दोघींचा ठावठिकाणा न लागल्याने सेलू पोलीस ठाण्यात खबर देण्यात आली.
बेपत्ता आरती काळे हिचा रंग गोरा, उंची सुमारे पाच फूट, शरीरयष्टी मध्यम, चेहरा लांबट, नाक सरळ, डोळे मध्यम व केस काळे आहेत. ती बेपत्ता होताना चॉकलेटी रंगाची साडी व ब्लाउज परिधान केले असून पायात काळ्या रंगाची चप्पल होती. तिला मराठी भाषा येते असून ती सहावीपर्यंत शिक्षित आहे. तिच्यासोबत ११ महिन्यांची मुलगी नंदिनी आहे.
याप्रकरणी सेलू पोलिसांनी बेपत्ता महिलेचा व तिच्या मुलीचा शोध सुरू केला आहे. दोघींबाबत कोणास काही माहिती मिळाल्यास सेलू पोलिसांशी संपर्क साधण्याचे आवाहन करण्यात आले आहे.
