सावित्री मंचच्या कार्यक्रमात डॉ.वृषाली किन्हाळकर यांचे प्रतिपादन
परभणी : जागतिक महिला दिनानिमित्त धर्मापुरी (ता.परभणी) येथील ज्ञानसाधना प्रतिष्ठानच्या सावित्री मंचच्या वतीने गुरुवारी, १२ मार्च २०२६ रोजी “जागृत मी, सक्षम मी” या विशेष व्याख्यानाचे आयोजन करण्यात आले होते. यावेळी प्रमुख वक्त्या लेखिका डॉ.वृषाली किन्हाळकर यांनी महिलांनी एकमेकींना आधारबळ देण्याचे आवाहन केले. डॉ.किन्हाळकर म्हणाल्या, की प्रत्येक यशस्वी स्त्रीच्या मागे दुसरी प्रेरणादायी स्त्री असते. स्त्रियांनी एकमेकींचा आदर राखत समाजातील सकारात्मक परिवर्तनाची जबाबदारी स्वीकारावी. युवतींना मोबाईलचा मर्यादित वापर करण्याचा सल्ला देतानाच, स्त्री सक्षमता म्हणजे केवळ शिक्षण व आर्थिक प्रगती नसून अंतःकरणातील प्रेम आणि माणुसकी जपणे होय, असे त्यांनी स्पष्ट केले.
प्रास्ताविकात ज्ञानसाधना प्रतिष्ठानच्या सचिव प्राचार्य शितल सोनटक्के यांनी स्त्रीत्वाचा आणि कर्तृत्वाचा गौरव केला. स्त्रियांनी शारीरिक व मानसिक आरोग्याचे संतुलन राखत आनंदी जीवन जगावे, असा संदेश त्यांनी कवितेद्वारे दिला. सिनेट सदस्य वर्षा दोडिया यांनी सावित्रीबाई फुले यांच्या कार्याचा गौरव करत स्वाभिमानाने चालण्याचे आवाहन केले.
कार्यक्रमास गंगाबाई सोनटक्के, निर्मला कोल्हे, उमादेवी धुळे, गयाताई भालेराव, प्राचार्य शशिकला अय्यर, अश्विनी वाकोडकर, डॉ. अर्पिता पाटील, डॉ. स्नेहल लाभशेटवार, रम्या कळमनुरीकर, रेखा नायक, लक्ष्मी कोटलवार, किरण काळे, सरोज देशपांडे, रेखा सावते, छाया गायकवाड, डॉ. सरिता सूर्यवंशी, गोदावरी धुळे आणि अंजली सावरगावकर आदींसह विद्यार्थिनी, शिक्षक व शिक्षकेतर कर्मचारी यांची उपस्थिती होती. सूत्रसंचालन एस.डी.धुळे यांनी केले, तर आभार एस.आर.रोडे यांनी मानले.
